Xa remata este ano 2008. A verdade é que trouxo un montón de aventuras. Nada mellor para rematalo que participar na Nercellada, que será día 31 as 17 horas no paseo Pontiñas.
Para os que non o saiban, a Nercellada é unha carreira entre os amigos do deporte de Lalín, que xurdiu case de forma espontánea. Unha versión da San Silvestre feita en Lalín. Eu creo que a versión supera a orixinal en espíritu festivo e cachondeos varios, incluídos disfraces e outras lerias estrafalarias. E chámase Nercellada en honor a familia Nercellas, saga de grandes deportistas.
Aínda que só participei nunha edición, teño que dicir que hai un ambiente moi especial e festivo. Este ano estarei tamén. Ademáis estará a xente de Concellos Saudables repartindo turrón e outras viandas. E por certo, o primeiro gaña unha empanadilla da panadería Nercellas.
Na foto superior está Pepe Nercellas recollendo o trofeo coma gañador da carreira pedestre de Lalín do ano 1985. Esta é sen dúbida unha foto histórica, de cando a carreira pedestre se organizaba polo instituto Laxeiro. Un rapaz do público que vai de azul resulta ser un servidor.
Por certo, felicitar a Pepe Nercellas, que acaba de ser pai hai pouco. A saga Nercellas continúa.